هى .... هو
هى : الو ... ازيك يا حبيبي
هو : كويس , وإنت ؟
هى : صوتك ماله ؟
هو : يعني راح يكون فى إيه , مش فى حاجه .. ومن الآخر انا كويس خالص
هى : لا , إنت صوتك فيه حاجه , وبعدين شوف إنت بتتكلم إزاى
هو : يوووووووووووووووه .. إنتى مش بتزهقى من كتر الكلام
هى : خلاص خلاص .. انا آسفه حقك على مش كنت اقصد
هو : (يصمت)
هى : إنت مش بتتكلم ليه؟
هو : سبت لك الكلام .. لما تبقى تخلصى الاسطوانه بتاعتك , أبقى وقتها اتنيل واتكلم
وبعدين انا عندى صداع ومش قادر اتكلم مع حد.
هى : الف سلامه عليك يا حبيبي
هو : شكرا
هى : انا كنت عاوزه اطمن عليك بس علشان مش كلمتك بقالى يومين , ع العموم انا هابقى اكلمك فى وقت تانى
غالبا بالليل زى ما إحنا متعودين نتكلم , لما تكون رجعت من خروجتك مع اصحابك.
هو : بلاش
هى : هو إيه اللى بلاش ..!!؟
هو : ياريت بلاش نتكلم تانى خالص , بصراحه انا حاسس .... حاسس .... ب...
هى : بلاش وحاسس ؟ هو فى إيه ؟ فهمنى ؟
هو : حاسس إنى مش بقيت بحبك , وبصراحه لازم ننهى اللى بنا , وانا آسف ...
هى : إنت بتتكلم بجد ولا بتهزر , المواضيع دى مش فيها هزار خالص ؟
هو : انا باتكلم بجد , وياريت مش تحاولى تتصلى تانى او تخلى حد من اصحابنا يعرف حاجه عن الكلام ده , لأن ده قرار ومش راح اغيره , وكنت عاوز اقول لك إن الايام اللى قضيتها معاكى كانت جميله بكل معانيها وإنك بنت تستاهلى كل خير ... مع السلامه
( صوت غلق السماعه يرن فى آذان الحبيبه)
,,,,,,
بعد مرور ثلاث سنوات ,
هى : الو .. الو..!!
هو : الو
هى : مين معايا حضرتك
هو : مش فاكره صوتى ... انا ...
هى : يااااااااااااااااااااااااااااااااااااااه ... إنت؟
هو : قبل اى حاجه اتمنى انك تكونى بخير و بصراحه انا كنت متردد مليون مره قبل ما اتصل
هى : انا كويسه الحمد لله , وكنت عاوز تتصل بقى علشان إيه؟
هو : ابدا كنت بس بأحاول اطمن عليكى
هى : انا الحمد لله كويسه ومعنوياتى احسن من زمان بكتير
هو : هو إنت مش بقيتي تنزلى الشارع خالص ليه؟
هى : على فكره انا بقالى كتييييير مش نزلت الشارع ... تقريبا من ثلاث سنين
هو : إيه؟ بتقولى إيه ؟ ليه ؟
هى : اصل انا من ثلاث سنين كنت باحب واحد وكنت عاوزه اضحى بعمرى علشان اخليه اسعد واحد فى الدنيا , بس فى يوم
اتصل بى وقالى بلاش . بلاش نعرف بعض تانى وقفل فى وشى السماعه , يومها عشت ايام وشهور كل اللى باعمله انى باعيط وبس , وقتها عيني حصل لها التهابات جامده و رحت عند اكتر من دكتور وجربت مليون نوع من القطره , بس كانت المشكله ان دموعى كانت اقوى من اى قطره لحد ما فى الآخر بدأت عيني تجف ... ومضاعفات مستمره على طول .. مش كنت عارفه إيه اللى بيحصل ... وفى يوم صحيت علشان الدكتور يقولى على حقيقه صعبه,,,
وقالى , انا آسف يا بنتى انتى حالتك دى ميؤوس منها ... وحاله غريبه ... عينيكى فيها كمية جفاف غير طبيعي ... والتهابات غير عاديه ... كان ليها تأثير كبير على الشبكية بتاعت عينيكى ... وتقريبا انتى راح تفقدى بصرك,
مع ان الحاله دى قليل خالص لما بتحصل.... وفعلا كان قدر ربنا فوق كل حاجه,,
بس الحمد لله عايشه حياتى الجديده كويس وإتعودت على إنها تبقى فى هدوء.
هو: مش ممكن اللى بتقوليه ده ...... لا .... مش ممكن , يعنى إنت دلوقتى مش بتشوفى ؟
هى : ايوه
هو : انا ...... انا......انا.....
هى : مش تضايق نفسك , ده نصيبي واخدته واتمنى انك تكون سعيد فى حياتك , مع السلامه
(صوت غلق السماعه يرن فى آذان العشيق السابق)
alaa
الرئيسية 
موضوع: قصة قصيرة حزينة .. هى .... هو 
الإثنين مايو 25, 2009 7:36 am
