fromalongtime
moderator
عدد المساهمات : 1034
تاريخ التسجيل : 24/05/2009
العمر : 42
الموقع : الكويت
 |  موضوع: يخرب بيتك يا سرياقوسي(لينين الرملي)  الإثنين يونيو 29, 2009 10:11 am | |
| ...............  من يوميات حصاوي لـ "لينين الرملي" .... الله يخرب بيتك يا سرياقوسي.
(علي المقهي رمي الشاب الصحيفة غاضبا وراح يلعن)
الشاب: الله يخرب بيتك يا سرياقوسي. إلهي ماتورد علي جنة.
حصاوي: مين سرياقوسي ده ؟
الشاب: ماتعرفش سرياقوسي ؟ مابتقراش جرايد حضرتك ؟ مابتتفرجش علي تليفزيون؟ مابتفتحش النت؟ أنت عايش في أنهي عصر؟
حصاوي: أنا فعلا مغمي عليا. قولي انت.
الشاب: سرياقوسي يبقي وزير داخلية فرنسا. قولي كمان أنك ما تعرفش فرنسا اللي بيلعب فيها زيدان!
حصاوي: آه يمكن قصدك ساركوزي
الشاب: أهو دا! سياسته وحشه قوي يا أستاذ. وبعدين جاهل. هو وزير داخلية يبقي ماله هو بقي ومال اللي بيهاجروا لفرنسا؟ دي مفروض شغلة وزير الخارجية ولا أنا غلطان؟ فرنسا باظت يا أستاذ وعليه العوض. أهو أنا كنت رايح فرنسا. دلوقتي مش رايح. والله ما أنا رايح
حصاوي: إيه اللي حصل ؟
الشاب: خلي الهجرة صعبة لفرنسا
حصاوي: أنت بتعرف فرنساوي؟
الشاب: لا. لكن دي مش مشكلة. هو أنا يعني بعرف عربي؟
حصاوي: فهمت كنت عايز تروح تدرس هناك
الشاب: ادرس إيه؟ صلي ع النبي. دا أنا ماصدقت خدت الثانوية بالعافية. أنا مش أهبل عشان أضيع عمري ع التعليم.
حصاوي: طب فهمني عايز تهاجر فرنسا ليه؟
الشاب: سؤال غريب قوي. عشان أشتغل طبعا
حصاوي آه فهمت. يعني عندك عقد عمل في فرنسا.
الشاب: ماعنديش عقود عمل ولا زفت. لكن كنت هدور علي شغل. الواد مرسي ابن خالتي هاجر وقشر بصل هناك ودلوقتي خد الجنسية
حصاوي خلاص امرك لله. دور علي شغل هنا
الشاب: أدي عيب أن حضرتك مش مثقف. هناك أقبض باليورو يعني أضرب الجنيه في سبعة وشويه.
حصاوي: بس عشان تشتغل هناك محتاج تاخد إقامة.
الشاب: كنت هتجوز واحدة فرنساوية وبكده أقدر أخذ الجنسية. لكن سيرياقوسي الله يلعنه, غير القانون وحط شروط صعبة للجواز من الأجنبي اللي زيي شفت التعصب؟
حصاوي: وأفرض ما فيش شروط صعبة. الفرنساوية دي تتجوزك ليه؟
الشاب: مش شرط تكون فرنساوية بالظبط. أي واحدة تكون مهاجرة وخدت الجنسية ومع ذلك هو مش هيبقي جواز بجد. هيبقي ع الورق وهدفع لها قرشين
حصاوي: وعقبال ما تلاقي شغل عشان تدفع لها وتاخد الإقامة عتقيم فين ؟
الشاب: يا سلام ؟ أقعد في أي خرابة. أنام في جنينه. هناك فيه حرية. قصدي كان فيه حرية. يا خسارتك يا فرنسا.
حصاوي: وليه ماتقعدش عند مرسي ابن خالتك؟
الشاب: مش عيوافق. حاكم أحنا يا مصريين بنبقي وحشين مع بعض في الغربة.
حصاوي: أقول لك. دور علي أي بلد تانية في أوروبا.
الشاب: كل البلاد دي هتقلد سرياقوسي حتي أمريكا, عايزه تقفل حدودها مع المكسيك عشان تمنع الهجرة غير الشرعية. آل يعني هما بيفهموا في الشرع العالم كله باظ يا أستاذ. آه يا مانفسي أروح فرنسا ولو يوم واحد عشان أطلع مظاهرة ضد وزير الداخلية ده الي اسمه.. أنت قلت لي اسمه بالصح إيه؟
حصاوي: أنا نفسي أسالك غير حكاية اليورو عايز تسيب بلدك وتهاجر لأوربا ليه؟
الشاب: ما هو الواد مرسي ابن خالتي قالي إن كل اللي في أوروبا هبل. أي حاجة تقولها لهم يصدقوك علي طول. امال هو الرزق واسع هناك ليه؟
( حصاوي يغشي عليه في الحال)
................. | |
|
نونا الحاج
active member
عدد المساهمات : 972
تاريخ التسجيل : 01/06/2009
العمر : 41
الموقع : مصر
| | موضوع: رد: يخرب بيتك يا سرياقوسي(لينين الرملي) الإثنين يونيو 29, 2009 10:51 am | |
| هو حوار فكاهي
لكن بين السطور كلام
جميله بجد
وقال بتوع اوروبا هبل
طيب
شكرا fromalongtime | |
|
الرئيسية 
