انتماء ... عقاب ... دكتوراه

.............

انتماء ... عقاب ... دكتوراه

قصة غريبة وعجيبة صنعت فى الاخر شخصية محترمة ومرموقة جدا , هى قصة صديق لى تعرفت عليه من فترة قصيرة...

الحكاية بقى ان الشخص ده وهو صغير فى المدرسة ( ايام اعدادى ) كان دايما واخد موقف سلبي مع باقى زمايله فى الصف لما كانوا يعملو مشاغبات مع المدرسين وحظه التعيس إن المرات القليله اللى كان يحاول ياشرك معاهم فيها ( وطبعا لقلة خبرته فى المشاكسات ) كان دايما المدرسين عينيهم تغفل عن باقى الطلبه ويتقفش هو بس .. والباقى غالبا معروف ليكم ومافيش داعى نحكى ...

المهم الطالب ده فى يوم وهو واقف فى الطابور بتاع المدرسه مع باقى زمايله , كان يسمعهم وكنوع من قلة الانتماء والعقلية يرددوا فى السلام الوطنى كلمة " زبادى ... زبادى " بدلا من " بلادى ... بلادى " وماحدش كان بياخد باله ..

صاحبنا بقى ابو حظ مالوش زى حاول يقلدهم فى يوم وفضل يقول أثناء تحية النشيد الوطنى " زبادى ... زبادى "
وكانت الجلاله واخداه على الاخر وبعد ماخلص الوصله بتاعته بيبص لقى ناظر المدرسه واقف جنبه وعينيه هاتطلع من مكانها .... مصيبه طبعا

سأله الناظر بقى بتقول " زبادى " ياشاطر , ولان صاحبنا مابيعرفش يكدب وصريح وواضح قاله ايون ياحضرة الناظر "زبادى .. زبادى" ..

ناظر المدرسه كان راجل طيب شوية لاضرب ولا عمل اى حاجه , كل اللى حصل انه سحب الواد من ايديه على مكتبه على طول وقال له انت النهارده مش هاتروح البيت غير لما ولى امرك يتفضل هنا فى المدرسه , اتصل بقى عليه ياشاطر لو تعرف رقمه , وفعلا اتصل الطالب على والده فى الشغل واعطى السماعه للناظر اللى طلب منه الحضور للمدرسه لان ابنه ارتكب سلوك غير اخلاقى فى طابور المدرسه.

وصل والد الطالب بعد شويه وحكى له الناظر على القصه اللى حصلت , وفجاه شرد الوالد للحظه لدرجة ان الناظر سأله سرحان بتفكر فى إيه ؟ ؟ , رد عليه وقال له بأمخمخ له على عقاب تربوى يكون طويييييل المده..

فكر الوالد كتير وفجاه قال للناظر انا خلاص لقيت العقاب المناسب وهو انه يقرا تاريخ مصر بالكامل ..
مصر اللى خلاها " زبادى " بدلا من " بلادى "..

وفعلا امر الاب ابنه بالعقاب ونفذه الابن وفضل كل يوم يقرا فى تاريخ مصر , اللى طبعا والده اضطر يصرف نص المرتب علشان الكتب اللى بالطبع احتاجت لمكتبه فى البيت..

مرت الايام والولد مستمر فى العقاب اللى ناله لحد ما كبر وخلص جامعه وحصل على الماجستير والدكتوراه فى التاريخ ..!!!

طبعا الموقف البسيط فى فعله والكبير فى قيمته واللى ارتكبه وهو صغير بتاع " زبادى " وعقاب والده ايضا كان له الفضل فى ان الانسان ده من كتر ما قرا فى التاريخ بتاع مصر حب الموضوع جدا ودخل كلية التربيه قسم التاريخ وحصل فى النهايه على الماجستير والدكتوراه كمان ..

حكايه طبعا قد إيه ليها شان كبير ..

بس السؤال .. هل ياترى الآباء كلهم بيفكرو للابناء فى نفس العقاب ده ..
ياريت يا آباءنا تعاقبونا باللى يخلينا نعلى لفوق مش نتحطم وننزل لتحت خالص ...
النهايه....

Alaa

هيه دي الاباء اللي بتفكر

وهو دا العقاب

قصة جميله جدا

شكرا على الموضوع المفيد fromalongtime

شكرا نونا على الرد والمتابعه
وياريت زى ما كتبت فى القصه نتعلم و كمان يتعلم اباءنا منها...
مجرد رأى

..............

قصة رائعه

ياريت الأباء يعاقبوا الأبناء كدا أحسن بكتير من العقاب البدنى

اللى مابيجبش نتيجة فى جميع الأحوال

مشكووووووووور fromalongtime موضع رائع جدا

.......................

شكرا mayoy على التعليق وعندك حق فيه طبعا
نتمنى ذلك ..!!!